【Viu】久未喺香港露面嘅Dicky張衞健今日現身活動，講到今年嘅大計，佢搞笑自稱冇乜planning，都係見步行步，嚟緊2月就會同兄弟許志安飛洛杉磯開騷！講到興起，Dicky漏口風指今年中後期有機會喺香港開騷：「個陣容係⋯應該係要去紅館先做到！」但Dicky就冇再講進一步嘅detail啦，莫非會係Big Four？
笑談今年係Dicky嘅登「六」之年，當佢一聽到可以「嘟一嘟 樂悠悠」嗰陣不禁大笑，幽默指如果戴齊帽、黑超、口罩，其他人都會以為佢得廿幾歲呀！死黨草蜢喺上年8月嗰陣為軟硬騷做嘉賓都有開過「嘟一嘟」嘅玩笑，咁啱蔡一智今日率先登「六」，Dicky笑話唔會向只係大一個月嘅阿智「取經」，而提到蔡一傑養病停工，Dicky謂有打電話問候對方：「Ok㗎！佢好強㗎！Very Good！」
另外，呢日又見文化體育及旅遊局局長羅淑佩出動，問到作為「頭號Hellosss」嘅羅局長有冇留意Ian@MIRROR最近嘅報道？聞偶像被網民抨擊會唔會心痛？去睇叱咤覺得當時嘅音響如何？有冇恭喜Ian攞獎？想知羅局長點答？即刻去睇足本訪問片啦！
