【Viu】天王劉德華嘅巡唱終於唱返嚟香港站啦！一共20場嘅跨年紅館騷《今天⋯is the Day劉德華巡迴演唱會2024》今晚開鑼！身穿灰白色套裝嘅華仔，一開騷就喺離地約3層樓嘅小高台登場，全場fans即起勢咁尖叫，勁震撼呀！華仔打頭陣唱出《今天》，邊唱邊勁hyper大叫：「我好掛住你哋呀！我返嚟啦！」
之後華仔就落台繼續跳唱《沒有人可以像你》，佢仲勁有誠意咁跑去兩邊同fans勁近距離互動，冧暈晒啲fans啦畀佢！華仔唱完呢首歌後突然消失喺台上，跟住大螢幕有個大碼版華仔現身，指住台中位置叫大家望下，此時就好似變魔術咁，換咗藍色外套、戴黑框眼鏡嘅華仔驚喜再現身，同fans大合唱《笨小孩》！
傾偈部分，事隔6年再開紅館騷嘅華仔大叫問：「等咗幾耐？我都等咗好耐啦！喺度再次畀我感受啲歡呼聲先！」又話今次係專登放棄半個紅館場地同fans拉近距離，隨後佢更搞笑變身指揮家，guide住全場fans大嗌：「我愛你！」氣氛爆high！為回饋fans對佢嘅愛，華仔接住落嚟唱《謝謝你的愛》，期間又係咁派心心添！另外，嚟睇騷嘅嘉賓有陳慧琳、梁詠琪、曾華倩、鍾珍、薛家燕同仔仔等！快啲去片聽華仔唱歌啦！
